Palmarés del 5u FESTIVAL DE CINE ASTURIANU

Polillas y La torre de Suso ganen nel 5u Festival de Cine Asturianu

Polillas, el curtiu del asturianu Pedro Touceda y la película La torre de Suso, de Tom Fernández fueron les obres ganadores nel 5u Festival de Cine Asturianu na edición del añu 2009 según los premios del xuráu oficial, compuestu n’esta ocasión por Illán Gonzali, Ana Cárdenas y Sara López. El curtiu ”Dos sabios” de Rocío García, rodáu en Les Caldes d’Uviéu, recibió’l premiu al Meyor Curtiumetraxe n’asturianu. Belén Rueda y Gonzalo de Castro recibieron los premios a los meyores actores, por El güerfanatu y La torre de Suso respectivamente. El meyor guion foi pa Sergio G. Sánchez por El güerfanatu y la meyor dirección foi pa José Antonio Bayona por El güerfanatu. El Meyor Documental foi pa Alfonso Suárez por “Voces en imágenes” y el Premiu d’Honor entregóse-y a l’actriz y cantante parraguesa Lilián de Celis. Na Gala de Pieslle también ufiertó un conciertu l’artista Celia González que cantó dellos temes a la zanfona acompañada del dulcimer Hervé Perrochon. Llueu de la Gala, el Grupu Teatru de Güeñu estrenó la obra de teatru “El misteriu del pelu roxu” orixinal de Xaviel Vilareyo, colos actores Elena García, Moisés Díaz y Álvaro Santovenia. El Ballet Baidán, que dirixe Amparo Villafruela, realizó una coreografía sobre un tema de Tomás Bretón n’homenaxe a una de les películes de Lilián de Celis. El gaiteru Pelayu Cuaya ufiertó también un recital de gaita.Polillas (Pedro Touceda, 2007) ye un monólogu irónicu, una reflexón poética de ónde venimos y aú vamos. Andéi Ivanov ye un rusu que vive n’Hespaña qu’hai tiempu qu’entamó un personal viaxe n’automóbil. Pedro Touceda, fíu d’asturianos, ye director de curtiumetraxes, periodista y director del “Festival Iberoamericano de Cortometrajes ABC.es”.La torre de Suso (Tom Fernández, 2007) cuenta la historia de cuatro amigos que s’axunten llueu de la muerte d’otru amigu n’Asturies.Dos sabios (Rocío García, 2008) ye la puesta n’imáxenes del famosu cuentu de Leopoldo Alas del mesmu títulu.

Celia González ufiertó un recital de temes del so últimu discu “Cantoras ya bordones” nel Teatru Filarmónica d’Uviéu xunta’l tañedor de dulcimer Hervé Perrochon esti miércoles 8 d’abril del 2009. El recital tuvo llugar dientro de la Gala del Cine Asturianu. El conciertu foi un éxitu y terminó col públicu dando palmes a los sones de la voz y la zanfona de Celia qu’interpretó dellos temes del so últimu trabayu. Nesta Gala de Pieslle del 5u Festival de Cine Asturianu, Celia González amás entregó ún de los premios, el premiu al Meyor Documental al realizador Alfonso Suárez.