FESTIVAL DE CINE ASTURIANU

miércoles, 28 de septiembre de 2011

Xaviel Vilareyo: "El cine ye una seña d'identidá mui importante pa toa nación"




Hasta’l momentu, anque pueda sorprender, nun se fixera n’Asturies una historia completa sobre’l cine asturianu. Había un vacíu por rellenar y Xaviel Vilareyo y Villamil (Mieres del Camín, 1967), direutor del Festival del Cine Asturianu, qu’esti añu vivió la sesta edición, decidióse a recopilar datos que, finalmente, permitieron la edición de ‘Historia del cine asturianu’ (Espublizastur), un llibru que nun pue faltar na biblioteca de los cinéfilos asturianos. Nél, el llector va alcontrar información sobre tola actividá que tuvo’l cine n’Asturies dende la primer proyección, un 13 d’agostu de 1895 nel antiguu Teatru Xovellanos de Xixón, hasta los nuesos díis, amás d’una filmografía completa del cine asturianu.

-¿Cómo xurde la idega de trabayar nuna ‘Historia del Cine Asturianu’?

La idega sal a raíz del Festival de Cine Asturianu. Yera necesariu facer una historia un poco completa del tol cine asturianu pa xustificar la esistencia propia del festival. Decidí facer un trabayu y esi trabayu convertióse nun llibru en dos años. Fui, poco a poco, recoyendo datos, diendo a filmoteques y biblioteques… Pa mi foi un trabayu prestosu de facer.

-¿Nun-y resultó complicao dar con tola información que recueye nel llibru?

Los más problemático foi facer una construcción cronolóxica que tuviera cierta coherencia interna, porque había datos que se solapaben nel tiempu. Esi foi’l trabayu más complicao pa mi.

-¿Foi difícil dar cola información sobre los ainicios del cine asturianu?

Lo más complicao foi atopar información de les époques más modernes, porque hai bastantes trabayos sobro la etapa de los oríxenes del cine. Quiciabes falta información sobre’l tiempu de la República y el franquismo, onde hai menos publicao sobre’l cine n’Asturies.

-Vusté divide’l llibru en delles etapes.

Quería facer una cronoloxía didáctica marcando etapes: cuándo xurde’l cine de ficción; el cine falante; la Guerra Civil y la dictadura, llende que marca un antes y un depués; cuándo xurde’l cine comercial; el d’autor; la etapa autonómica; los nuevos realizadores… Éstos, a grandes rasgos, son los capítulos que voi marcando a lo llargo de la historia del cine asturianu.

-¿Tien en mente afondar más nel tema?

La mio idega ye que’l llibru continúe porque la historia del cine sigue. Esperemos que tenga ésitu pa poder facer más ediciones y dir ampliándolu a les películes nueves. De xuru que quedaron munches coses por sacar a la lluz. Por ello, animo a tol mundu que siga investigando y qu’eche una mano tamién. Pa mi ye una responsabilidá escribir la historia del cine asturianu dende los oríxenes; ye un llabor ampliu. De toes formes, creo que como llibru compactu quedó bastante bien y toi mui contentu del resultáu. Agora hai que siguir investigando, trabayar y sacar nuevos datos, nueves películes y autores. Hai una xeneración nueva que ta con munches ganes de salir alantre y de facer películes. Esperemos que’l cine asturianu vaya a más.

-¿Cómo ye la salú del cine asturianu?

Hai muncha xente que ta faciendo coses y quier dedicase a facer cine, non sólo nel planu artísticu, tamién nel téunicu pero falta industria y medios. Los realizadores nuevos deberíen tamién adaptase a les teunoloxíes nueves. Pienso que’l futuru del cine ye dixital, y facer cine dixital ye una cosa mui barata. Lo que pasa ye que cuando fales de cine dixital, los direutores y realizadores venlo como dalgo menor: ellos quieren rodar en cine tradicional, dalgo que ye mui caro agora y pa lo que se necesita una bona financiación.

-¿Nun hai trabayos en cine dixital?

Sí, pero paez que tovía rodar en cine ye dalgo más prestixosu. Evidentemente, el cine con estes cámares ye un cine mui bonu, pero la teunoloxía dixital avanzó tanto que ye’l futuru del cine. Si s'axusten presupuestos, porque ta claro qu’hai pagar actores, los equipos y mover xente, se pue facer n’Asturies coses mui dignes ensin un gastu altu.

-¿Hai que colar d’Asturies pa trunfar nel mundu del cine?

Nun creo que sía necesario colar a Madrid pa trunfar. Agora tenemos inclusive estudios de cine, los que se quieren facer n’Olloniego, lo que facilitaría’l rodaxe n’interiores. Pienso que ye al revés: son munches más les producciones de Madrid que vinieron a rodar esteriores a Asturies polos beneficios paisaxísticos que tenemos poles nueses montañes, el mar o la lluz tan cinematográfica qu’hai. Entós, tamién tenemos toles ventayes pa rodar cine n’Asturies. El problema ye la falta de productores, porque tenemos direutores, actores, téunicos… Pero les que manden son les productores y son de fuera, lo que lleva a que’l direutor asturianu nun mande na producción. Fai falta una productora asturiana que diga “vamos a facer una producción asturiana al 100 por cien” y que se contrate a teúnicos y actores asturianos. Esto lo fai Garci, direutor que tantes crítiques recibe. Nes sos películes sí que participen téunicos asturianos y cuida qu’haya asturianos na película. L’exemplu de Garci había qu’estendelo a tolos realizadores.

-Nel so llibru, dedica un capítulu completu a José Luis Garci pese a nun ser asturianu.

Non tol cine de Garci podemos consideralu asturianu, pero dientro la so producción hai unes películes que sí podemos calificales como asturianes bien porque les rodó equí n’Asturies o porque la temática ye mui asturiana. Él nun nació n’Asturies, pero podemos calificalu como un asturianu d’adopción. Amás, él presume de ser asturianu.

-¿Cómo ye l’usu de la llingua asturiana nes películes rodaes n’Asturies con capital esterior?

Tenemos dos exemplos mui claros. Ún ye ‘Carne de gallina’, onde la fala asturiana sí que tuvo más cuidada. Nel caso d’Anabel Alonso, ella molestóse en deprender el vocabulariu y el tonu, y foi al Centru Asturianu de Madrid pa ver si había dalgún métodu pa daprender asturianu. Una bona actriz debe preocupase tamién y Alonso, siendo vasca, fixo un papel d’asturiana bastante bonu. A la contra tenemos ‘La torre de Suso’, onde los actores madrilanos nun se molestaron muncho en reproducir la fala asturiana y el so dexe madrilanu na película chirriábanos. Ello depende muncho del direutor, anque tamién del actor. Hai películes que sí requieren un usu de la llingua especial, porque forma parte de la idiosincrasia de la película. Pue facese una película asturiana en castellanu y nun pasa nada, pero cuando los personaxes tan mui metíos nel mundu rural, la película sí que pide un usu de la llingua más efectivu.

-¿Hai dalguna carauterística que pudiera definir el cine asturianu nos sos más de 100 años d’historia?

Sí, pue dicise que’l cine asturianu ye un cine mui averáu a la realidá; al documentu, al paisanaxe; a reproducir un poco les esencies. Igual nun ye dalgo buscao, sinón que los direutores sían inconscientes d’ello. Cuando venía a rodar Gonzalo Delgrás o otros profesionales, intentaben reproducir les esencies asturianes. Por eso podemos dicir que’l cine asturianu ye mui realista. Nun hai munches producciones asturianes de ciencia ficción o historicistes, como pudiera ser sobro la monarquía asturiana. Son películes mui apegaes al terruñu y esa ye una constante en tola historia del cine asturianu, lo que nun quita que se pudiera facer otru tipu de cine n’Asturies.

-El llibru tien una edición mui curiosa y destaca poles sos semeyes.

Un llibru sobro cine tien que tener munches semeyes y la pena d’esti llibru ye que munches semeyes tuvieron que quedar fuera. Evidentemente, material gráficu teníemos abondo pa mostrar una historia del cine asturianu, pero nun podíamos abusar de tanta semeya porque si non saldría una revista ilustrada y la idega yera facer un llibru que recoyera, en testu, la historia del cine asturianu. Pa futures ediciones espero poder meter más semeyes y facer un llibru más visual nel que poder introducir una bona cantidá de cartelos de les películes que, pa mi, tamién son una obra d’arte.

-¿Queda muncho por recopilar sobre la historia del cine asturianu?

Sí, queda tovía muncho por facer, por eso animo a tol mundu a que llea’l llibru, pero tamién a qu’investigue. El campu ye mui ampliu y sería importante investigar cómo se recibieron les películes, cuáles gustaron más o menos, cuáles foron acertaes… Facer una llabor de crítica de les películes que ye un tema mui interesante y que requier un poco d’atención por parte de tolos asturianos porque’l cine ye una seña d’identidá mui importante pa una nación.