FESTIVAL DE CINE ASTURIANU

miércoles, 27 de abril de 2011

Nominaos a los Premios del 7u Festival de Cine Asturianu 2011




El Festival de Cine Asturianu entregará los premios de la so sétima edición nuna Gala que tendrá llugar nel Atenéu de Madrid el próximu llunes 9 de mayu onde se rendirá un homenaxe al guionista Carlos Blanco como Premiu d'Honor d'esta 7a edición del Festival.


Los trabayos finalistes nominaos a los premios na categoría de curtiumetraxes nesta edición són los siguientes: Vidas, de Nacho Fernández y Pablo Bermejo; Idealizando, de Moisés Tuñón; Duets el precio de la fama, de Tito Montero; Puntu, d'Eva Gallego; Cruces, de Moisés Tuñón; Tacones, de Benjamín Villaverde; Anorexia, de Kiko y Javier Prada; El detective imaginario, de Juan José Bors y Días Perdidos, de Senén Fernández.


Na categoría de meyor actor los finalistes nominaos son: David Ballesteros por Idealizando, David Rionda por Duets el precio de la fama; Javier Longas por Días perdidos y Jesús Pardo por Días perdidos.


Les nominaes al Premiu a la Meyor Actriz són: Lara Fernández-Noriega por Cruces; Almudena Gallego por Anorexia y Susana Carnero por El detective imaginario.


El guionista asturianu Carlos Blanco recibirá'l Premiu d'Honor del Cine Asturianu que concede'l Festival de Cine Asturianu na so sétima edición. L'homenaxe a Carlos Blanco tendrá llugar el próximu 9 de mayu del 2011 nel Atenéu de Madrid, onde s'entregarán los Premios d'esta edición del Festival.

Carlos Blanco Hernández ye unu de los guionistes asturianos más importantes. Nació en Xixón el 13 de marzu de 1917. Marchó pa Madrid en 1934 nun pudiendo terminar nengún estudiu por causa de la Guerra Civil yá que lu mobilizaron en 1936 pal exércitu republicanu y por ello sufrió depués xuiciu sumarísimu poles tropes franquistes debío a la so condición de teniente d’artillería y por ello tuvo presu depués de la guerra. Escribió pa les revistes Primer plano y Cámara. El so primer contactu cola escritura pal cine foi a mediaos de 1940 cuando ganó una mención honorífica de los premios del sindicatu vertival d’espectáculos pol guión tituláu Don Beltrán de la Cueva que nunca llegó a rodase. El so primer guion pal cine foi Cuando llegue la noche, película de 1946 sobre la obra teatral homónima de Joaquín Calvo Sotelo. Otru guion suyu foi el premiáu de La princesa de los Ursinos (1947), al que siguió en 1948 el guión de Les agües baxen negres, de temática asturiana y basáu na novela L’aldea perdida de Palacio Valdés. En 1955 ruédase en Xixón otru de los sos guiones: Los pexes coloraos, dirixida por José Antonio Nieves Conde. Esti mesmu añu Carlos Blanco recibe un contratu de la 20th Century Fox pa escribir un guion, Zaino, que tampoco llegó a rodase. Pa la R.K.O escribió Un gánster nel colexu y Melva, versión llibre d’un cuentu de Máximu Gorki, razón pola que vivió nos Estaos Uníos durante un añu.







La sétima edición del Festival de Cine Asturianu fairáse en Madrid onde s'entregarán un añu más los Premios del Festival nes sos diferentes categoríes. L'eventu tendrá llugar el día llunes 9 de mayu nel Atenéu de Madrid, allugáu na cai del Prado 21, escenariu onde nació la primer edición del Festival de Cine Asturianu nel añu 2005 col apoyu de la Sección de Cine d'esta vieya institución. Nos actos, d'asistencia llibre y gratuíta, amás de la entrega de Premios del xuráu d'esta edición tendrá lugar la proyección de los curtios ganadores, homenaxes a destacaes personalidaes del cine asturianu. Tamién presentaráse per primer vegada en Madrid el llibru Historia del Cine Asturianu, de Xaviel Vilareyo, un documentáu repasu a tola historia del sétimu arte asturianu dende la mesma llegada del cine a Asturies hasta l'actualidá. Los xuraos d'esta edición del Festival són los realizadores Teresa Marcos, Iñaki Ibisate y Ángeles Muñiz, participantes y premiaos n'anteriores ediciones del Festival. El Festival promociona trabayos documentales y de ficción de realizadores asturianos o bien rodaos n'Asturies o en llingua asturiana col fin de dar a conocer el cine asturianu más actual asina como reconocer a les figures más destacaes de la historia del cine asturianu. Gil Parrondo, Mary Paz Pondal, Xuan Gona, Gonzalo Suárez, Lilián de Celis y Juan José Otegui yá pasaron pel Festival de Cine Asturianu recibiendo'l so Premiu d'Honor del Cine Asturianu n'anteriores ediciones.




No hay comentarios:

Publicar un comentario