Juan José Otegui, Premiu d'Honor del 6u Festival de Cine Asturianu

Juan José Otegui,
Premiu d'Honor del 6u Festival de Cine Asturianu

L'actor Juan José Otegui recibirá'l Premiu d'Honor del 6u Festival de Cine Asturianu el próximu 24 de febreru durante la Gala de Pieslle del Festival. El veteranu actor, nacíu n'Uviéu en 1936, ye ún de los actores míticos de la escena teatral y cinematográfica n'Hespaña. Entamó nel Teatru Universitariu d'Uviéu debutando en 1968 nun curtiumetraxe de José Luis García Sánchez tituláu Pólipos nes trompes. Dende entós la so filmografía ye mui llarga: L’amor y otres soledaes, Asesinatu nel comité central, Tiempu de silenciu, El vuelu de la palomba, Belle epoque, La bicicleta y tamién nes recientes producciones de Pedro Almodóvar como Tacones llonxanos, La flor del mio secretu y Too sobre mio madre. Nesti añu de 2010, Juan José Otegui anuncia la so retirada de los escenarios, llueu d'una llarguísima y destacada carrera como actor.

El Festival de Cine Asturianu entamará'l llunes 22 cola presentación en Xixón de los nominaos a los Premios del Festival que tendrá llugar nel Salón d'Actos de la Biblioteca Xovellanos a partir de les 7 la tarde. A les 7,30 proyectaráse una de les mítiques películes mudes del cine asturianu, Mieres del Camín (Juan Díaz Quesada, 1927). Y a les 8 la tarde tendrá llugar la presentación del llibru Historia del Cine Asturianu, de Xaviel Vilareyo, nel mesmu llugar onde se proyectó cine per primer vez en Xixón nel añu 1896, nel llugar onde antaño s'allugó'l vieyu Teatru Xovellanos, que güei ocupa la Biblioteca Pública de la ciudá.Los nominaos nesti 6u Festival como meyores curtiumetraxes són nes categoríes de competición: Almas perdidas (Julio de la Fuente, 2008), Carla (Kiko y Javier Prada, 2008), El plan B (José Bors, 2006), Estación de carretera (Kiko y Javier Prada, 2009), Fémina domus (Jaime Fernández, 2009), Sin cobertura (Iñaki Ibisate, 2009), La vocación (Xavi Vilareyo, 2009), Puntu (Eva Gallego, 2009), Vencíu (Santos Hevia, 2009). Como Meyores Documentales tán nominaos los trabayos: Bajar la música (Martín-Parra-Otero, 2009), Conceyu de Valdés un llugar apasionante (Hi-video, 2008), Pablo Maojo (Rai García, 2009) y Tom Zé astronauta llibertáu (Ígor Iglesias, 2009). Los miembros del xuráu daránse a conocer na Gala de Pieslle del día 24 de febreru.El 6u Festival de Cine Asturianu va tener llugar del 22 al 24 de febreru del añu 2010 nel marcu del Teatru Filharmónica d’Uviéu onde tendrán llugar les Gales de Presentación el 23 de febreru y la Gala de Pieslle del día 24 cola entrega de Premios del Festival, les dos a partir de les 6 de la tarde. L’asistencia a tolos actos del Festival de Cine Asturianu ye gratuíta.El Festival de Cine Asturianu concederá premios en diverses categoríes ente elles al Meyor Curtiumetraxe n’Asturianu y en Castellanu y a la Meyor Película. El festival remembrará’l centenariu de la película Día de fiesta en Candás, de Julio Peinado y el centenariu del Cinema Versalles, el primeru construyíu en Xixón esclusivamente pal cine.


LLUNES 22 FEBRERU, Salón d’Actos de la Biblioteca Xovellanos de Xixón:

19h: Presentación del 6u Festival de Cine Asturianu
19,30h: Proyección de la película muda asturiana Mieres del Camín (Juan Díaz Quesada, 1927)
20h: Presentación del llibru Historia del Cine Asturianu, de Xaviel Vilareyo.


MARTES 23 FEBRERU:

18h. Teatru Filarmónica d’Uviéu: Gala de Proyecciones.


MIÉRCOLES 24 FEBRERU:

18h. Teatru Filarmónica d’Uviéu. Gala de Pieslle y entrega de Premios. Homenaxe a Juan José Otegui.